പ്രശസ്ത അമേരിക്കന്‍ ബയോമെഡിക്കല്‍ ഗവേഷകനായിരുന്ന ലിയൊനാര്‍ഡ് ഹെയ്ഫ്ലിക്ക് (Leonard Hayflick) അന്തരിച്ചു. പ്രായം കൂടുന്നത് സംബന്ധിച്ച സുപ്രധാനമായ കണ്ടെത്തലുകളിലൂടെ ലോകശ്രദ്ധയാകര്‍ഷിച്ച ഗവേഷകനായിരുന്നു ഇദ്ദേഹം. പ്രധാനമായും മനുഷ്യകോശങ്ങളുടെ വിഭജനം, പ്രായമാകല്‍ തുടങ്ങിയ മേഖലകളിലാണ് അദ്ദേഹം നിര്‍ണായക കണ്ടെത്തലുകള്‍ നടത്തിയത്. മനുഷ്യശരീരത്തിലെ ഒരു സാധാരണ കോശം എത്രതവണ വിഭജിക്കപ്പെടും എന്നു വിശദീകരിക്കുന്ന ഹെയ്ഫ്ലിക്ക് ലിമിറ്റ് (Hayflick limit) എന്ന സിദ്ധാന്തം ഇദ്ദേഹത്തിന്റെ സംഭാവനയാണ്. 1961ലാണ് ഇദ്ദേഹം മനുഷ്യകോശത്തിന്റെ പ്രായം നിര്‍ണയിച്ചത്. 1928ല്‍ ഫിലാഡല്‍ഫിയയിലാണ് ഹെയ്ഫ്ലിക്ക്  ജനിച്ചത്.