ഡിഎന്‍എയുടെ ഘടന കണ്ടുപിടിച്ചവരില്‍ ഒരാളും നോബല്‍ പുരസ്കാര ജേതാവുമായ അമേരിക്കന്‍ ശാസ്ത്രജ്ഞന്‍ ജയിംസ് വാട്സണ്‍ (97) അന്തരിച്ചു.
1953-ലാണ് ഡിഎന്‍എയുടെ ഇരട്ട പിരിയന്‍ ഗോവണി ഘടന (Double Helix) കണ്ടുപിടിച്ചത്. ഇരുപതാം നൂറ്റാണ്ടിലെ ഏറ്റവും പ്രധാനപ്പെട്ട ശാസ്ത്ര നേട്ടമായാണ് ഡിഎന്‍എ ഘടനയുടെ കണ്ടുപിടിത്തത്തെ വിശേഷിപ്പിക്കുന്നത്. ഡിഎന്‍എ എങ്ങനെയാണ് പാരമ്പര്യ വിവരങ്ങള്‍ സൂക്ഷിക്കുന്നതെന്നും കോശങ്ങള്‍ വിഭജിക്കുമ്പോള്‍ ഡിഎന്‍എയെ എങ്ങനെ പകര്‍ത്തിയെടുക്കുന്നുവെന്നും ഇതിലൂടെ വിശദീകരിച്ചു. ഈ കണ്ടെത്തല്‍ ആധുനിക ജനിതകശാസ്ത്രത്തിന് അടിത്തറയിടുന്നതായിരുന്നു. പിന്നീട്, ജനിതക പരിശോധന മുതല്‍ ജീന്‍ എഡിറ്റിങ് വരെയുള്ള നിരവധി ശാസ്ത്രീയ മുന്നേറ്റങ്ങള്‍ക്ക് വഴിമരുന്നിട്ടത് ഈ കണ്ടുപിടിത്തമാണ്. ഈ കണ്ടെത്തലിന് 1962-ല്‍ ബ്രിട്ടീഷ് ശാസ്ത്രജ്ഞനായ ഫ്രാന്‍സിസ് ക്രിക്കിനും മൗറിസ് വില്‍ക്കിന്‍സിനുമൊപ്പം ജയിംസ് വാട്സന് വൈദ്യശാസ്ത്രത്തിനുള്ള നോബല്‍ സമ്മാനം ലഭിച്ചു.
1928 ഏപ്രില്‍ 6 ന് ചിക്കാഗോയിലായിരുന്നു വാട്സന്റെ ജനനം. ഇംഗ്ലണ്ടില്‍ ‍കേംബ്രിജിലായിരുന്നു ഡിഎന്‍എ ഘടനയേക്കുറിച്ചുള്ള അദ്ദേഹത്തിന്റെ ഗവേഷണം.